Ayni kunlarda futbol ishqibozlarining etibori Yevro-2024ga qaratilgan. Lekin klub miqyosida ham ko'plab yangiliklar bor. Biz bugun Yevropa futbolidagi so'nggi transfer mish-mishlari haqida ma'lumot beramiz.
"Real Madrid" sardori Saudiya klubiga o'tmoqda
Nachoning "Real Madrid"ni tark etishi mumkinligi haqidagi ma'lumotlar anchadan beri tarqalib kelmoqda. Ammo futbolchining yangi klub tanlashi hammani hayratga soldi. Fabritsio Romanoning xabariga ko'ra, himoyachi "Al-Qodsiya" bilan shartnoma imzolaydi. Hafta boshida futbolchi tibbiy ko'rikdan o'tdi, faqat ikki yillik shartnoma imzolash qoldi. Bu barcha hujjatlar tasdiqlangandan keyin sodir bo'ladi. Nacho butun faoliyati davomida "Real"da o'ynagan. Uning amaldagi shartnomasi 2024-yilning 30-iyunida tugaydi. 2023/2024-yilgi mavsumda u Ispaniya chempioni va Chempionlar ligasi g'olibiga aylandi.
“Bavariya” yosh futbolchi uchun 60 million yevro to‘lamoqchi
"Bavariya" "Kristal Pelas" vingeri Maykl Olize transferiga rozi bo'ldi. Insayder Romanoning ta'kidlashicha, Myunxen klubi futbolchi uchun 53 million yevro to'laydi. Yana 5,9 million yevro bonuslar shaklida taqdim etiladi. Boz ustiga, “Bavariya” 22 yoshli futbolchi bilan shaxsiy shartnoma shartlarini kelishib olgan. Olise Angliyada tug'ilgan, ammo Fransiya fuqaroligiga ega. 2023/2024-yilgi mavsumda u Premyer-liganing 19 uchrashuvida gol+pas tizimida 16 (10+6) ochko jamg'argan.
"Real" Karvaxalga o'rinbosar qidirmoqda
Dani Karvaxalning "Real" bilan amaldagi shartnomasi 2025-yilning yozida yakuniga yetadi. Tomonlar yangi shartnoma shartlari bo‘yicha kelishib olishmagan, shu bois Madrid klubi uning o‘rnini bosuvchi futbolchining ehtimoliy variantlarini ko‘rib chiqmoqda. "AS" nashrining xabariga ko'ra, "Real"da qanot himoyachisiga ikkita nomzod bor. Bu "PSJ"dan Ashraf Hakimi va "Chelsi"dan Ris Jeyms. Marokashlik futbolchi avval "Real"da o'ynagan. Karvaxal "Real Madrid" tarbiyalanuvchisi hisoblanadi. U butun faoliyatini klubda o'tkazdi.
"Barselona" sardori jamoadan ketadimi?
Serxi Roberto Kataloniyaning boshqa klubiga o'tishi mumkin. "Barselona" sardori rahbariyatdan kelajagi borasidagi qarorni kutmoqda. Hammasi klubning moliyaviy ahvoliga bog'liq. Xabarlarga ko'ra, u Chempionlar ligasida o'ynaydigan "Jirona"ga o'tishi mumkin. Futbolchi uchun Ispaniyaning boshqa klublari "Sevilya" va "Valensiya" ham davogarlik qilmoqda.
“Aston Villa” Matsen uchun jiddiy kurashmoqda
Yan Matsen o'tgan mavsumning ikkinchi yarmini Dortmundning "Borussiya" klubida ijara asosida o'tkazdi. Futbolchi nemis klubi safida 23 ta o‘yinda 3 ta gol urdi va 2 ta golli uzatmani amalga oshirdi. "Borussiya" rahbariyatiga Matsenning o'yini yoqdi - uni "Chelsi"dan sotib olishni rejalashtirishgan. Ammo keyin "Aston Villa" oraga aralashdi. Qayd etilishicha, Birmingem klubi futbolchini "Borussiya"dan sotib oladi. "Chelsi" nemis jamoasidan 35 million yevro talab qilmoqda.
Hummels “Roma” bilan shartnoma imzolaydi
Dortmundning “Borussiya” klubi sobiq himoyachisi Mats Hummels yangi klub izlamoqda. Dortmundliklar avvalroq futbolchining shartnoma muddati tugashi sababli ketishini tasdiqlagan edi. "Roma" Hummels uchun yaxshi variantlardan biri. Ma'lumotlarga ko'ra, himoyachi bir mavsumga shartnoma imzolashga tayyor.