Сардорлар жамоаларини тарк этишмоқда
Европада амалга ошиши кутилаётган трансфер янгиликлари.
Айни кунларда футбол ишқибозларининг этибори Евро-2024га қаратилган. Лекин клуб миқёсида ҳам кўплаб янгиликлар бор. Биз бугун Европа футболидаги сўнгги трансфер миш-мишлари ҳақида маълумот берамиз.
"Реал Мадрид" сардори Саудия клубига ўтмоқда
Начонинг "Реал Мадрид"ни тарк этиши мумкинлиги ҳақидаги маълумотлар анчадан бери тарқалиб келмоқда. Аммо футболчининг янги клуб танлаши ҳаммани ҳайратга солди. Фабрицио Романонинг хабарига кўра, ҳимоячи "Ал-Қодсия" билан шартнома имзолайди. Ҳафта бошида футболчи тиббий кўрикдан ўтди, фақат икки йиллик шартнома имзолаш қолди. Бу барча ҳужжатлар тасдиқлангандан кейин содир бўлади. Начо бутун фаолияти давомида "Реал"да ўйнаган. Унинг амалдаги шартномаси 2024 йилнинг 30 июнида тугайди. 2023/2024 йилги мавсумда у Испания чемпиони ва Чемпионлар лигаси ғолибига айланди.
"Бавария" ёш футболчи учун 60 миллион евро тўламоқчи
"Бавария" "Кристал Пелас" вингери Майкл Олизе трансферига рози бўлди. Инсайдер Романонинг таъкидлашича, Мюнхен клуби футболчи учун 53 миллион евро тўлайди. Яна 5,9 миллион евро бонуслар шаклида тақдим этилади. Боз устига, "Бавария" 22 ёшли футболчи билан шахсий шартнома шартларини келишиб олган. Олисе Англияда туғилган, аммо Франция фуқаролигига эга. 2023/2024 йилги мавсумда у Премьер-лиганинг 19 учрашувида гол+пас тизимида 16 (10+6) очко жамғарган.
"Реал" Карвахалга ўринбосар қидирмоқда
Дани Карвахалнинг "Реал" билан амалдаги шартномаси 2025 йилнинг ёзида якунига етади. Томонлар янги шартнома шартлари бўйича келишиб олишмаган, шу боис Мадрид клуби унинг ўрнини босувчи футболчининг эҳтимолий вариантларини кўриб чиқмоқда. "АS" нашрининг хабарига кўра, "Реал"да қанот ҳимоячисига иккита номзод бор. Бу "ПСЖ"дан Ашраф Ҳакими ва "Челси"дан Рис Жеймс. Марокашлик футболчи аввал "Реал"да ўйнаган. Карвахал "Реал Мадрид" тарбияланувчиси ҳисобланади. У бутун фаолиятини клубда ўтказди.
"Барселона" сардори жамоадан кетадими?
Серхи Роберто Каталониянинг бошқа клубига ўтиши мумкин. "Барселона" сардори раҳбариятдан келажаги борасидаги қарорни кутмоқда. Ҳаммаси клубнинг молиявий аҳволига боғлиқ. Хабарларга кўра, у Чемпионлар лигасида ўйнайдиган "Жирона"га ўтиши мумкин. Футболчи учун Испаниянинг бошқа клублари "Севиля" ва "Валенция" ҳам давогарлик қилмоқда.
“Астон Вилла” Матсен учун жиддий курашмоқда
Ян Матсен ўтган мавсумнинг иккинчи ярмини Дортмунднинг "Боруссия" клубида ижара асосида ўтказди. Футболчи немис клуби сафида 23 та ўйинда 3 та гол урди ва 2 та голли узатмани амалга оширди. "Боруссия" раҳбариятига Матсеннинг ўйини ёқди - уни "Челси"дан сотиб олишни режалаштиришган. Аммо кейин "Астон Вилла" орага аралашди. Қайд этилишича, Бирмингем клуби футболчини «Боруссия»дан сотиб олади. "Челси" немис жамоасидан 35 миллион евро талаб қилмоқда.
Ҳуммелс "Рома" билан шартнома имзолайди
Дортмунднинг "Боруссия" клуби собиқ ҳимоячиси Матс Ҳуммелс янги клуб изламоқда. Дортмундликлар аввалроқ футболчининг шартнома муддати тугаши сабабли кетишини тасдиқлаган эди. "Рома" Ҳуммелс учун яхши вариантлардан бири. Маълумотларга кўра, ҳимоячи бир мавсумга шартнома имзолашга тайёр.
