Saudiya Arabistoni yangi OPEC+ kelishuvi imzolashga umid bildirmoqda. Bu haqda mamlakat energetika vaziri Abdulaziz bin Salmon al-Saud maʼlum qildi.
Vazir Financial Times nashriga bergan intervyusida yuqoridagi rejalarni ochiqlagan. Shu bilan birga u agar talab katta bo‘lsa, neft qazib olish ko‘paytirilishini aytgan.
Abdulaziz ibn Salmon ushbu kelishuvga Rossiya ham jalb qilinishini inkor qilmagan. Shuningdek, u dunyoda nima uchun “qora oltin” narxi oshib ketganini izohlagan.
“so‘nggi 3 yilda butun dunyo 4 million barrel neftni qayta ishlash quvvatlarini yo‘qotdi, ularning 2.7 millioni esa koronavirus pandemiyasi boshlanganidan buyon yo‘qotildi”, – degan u.
OPEC+ kelishuviga 2017 yilda erishilgan. 2020 yilda u 2022 yil oxiriga qadar uzaytirildi. Kelishuv orqali neft ishlab chiqaruvchi davlatlarning “qora oltin” qazib olishi uchun limit o‘rnatilgan. Rossiya-Ukraina mojarosi ortidan Vashington bir necha bor Saudiya Arabistoniga neft qazib olishni ko‘paytirishni so‘rab murojaat qildi. Ammo Ar-Riyod OPEC+ kelishuvini buzmasligini taʼkidladi.
Avvalroq Yevropaning Rossiya neftidan voz kechishi uchun qancha mablag‘ zarurligi ochiqlangandi.