Avvalroq Toshkent shahridagi “Paxtakor” stadionida futbol o‘yilarini yoritishga borgan telekanal tasvirchisi organ xodimlari tomonidan kaltaklangani xabar qilingandi. Mazkur holat yuzasidan Bosh prokuratura rasmiy munosabat bildirdi.
Ma’lum qilinishicha, joriy yilning 11-iyun kuni futbol bo‘yicha U-23 Osiyo kubogi chorak finali doirasida O‘zbekiston – Iroq o‘yinini yoritishga borgan “Sevimli” telekanali muxbiri va tasvirchisi hamda huquqni muhofaza qiluvchi organ xodimlari o‘rtasida (kelishmovchilik—tah.) kelib chiqqan holati o‘rganilgan.
Holat bo‘yicha Shayxontohur tuman prokuraturasi tomonidan Jinoyat kodeksining 206-moddasi (Hokimiyat yoki mansab vakolati doirasidan chetga chiqish) bilan jinoyat ishi qo‘zg‘atilib, dastlabki tergov harakatlariga kirishilgan.
“Tergovning borishi ustidan Bosh prokuratura tomonidan alohida nazorat o‘rnatildi”, — deyiladi xabarda.