O‘zbekiston Respublikasi Prezidenti Shavkat Mirziyoyev 4-fevral kuni Iordaniya Hoshimiylar Podshohligi Senati raisi Faysal Aqif Mishal al-Fayoz boshchiligidagi delegatsiyani qabul qildi.
Uchrashuv avvalida Iordaniya Senati raisi davlat rahbariga Podshoh Abdulla II ibn al-Husaynning samimiy salomi va ezgu tilaklarini yetkazdi.
Muloqot chog‘ida o‘tgan yili Samarqand shahrida oliy darajada erishilgan kelishuvlarni amalga oshirish doirasida O‘zbekiston–Iordaniya keng qamrovli sheriklik munosabatlarini yanada rivojlantirish masalalari ko‘rib chiqildi. Ikki tomonlama aloqalar va almashinuvlar faollashgani, o‘zaro savdo hajmi hamda qo‘shma korxonalar soni ortib borayotgani mamnuniyat bilan qayd etildi.
Parlamentlarda tashkil etilgan “do‘stlik guruhlari” faoliyatini tasdiqlangan “yo‘l xaritasi” asosida yanada faollashtirish, ularning davlat rahbarlari darajasida erishilgan kelishuvlarni samarali amalga oshirishdagi rolini kuchaytirish muhimligi ta’kidlandi.
Shuningdek, savdo, sanoat kooperatsiyasi, turizm hamda madaniy-gumanitar sohalardagi hamkorlikni kengaytirishga alohida e’tibor qaratildi. Xususan, joriy yilda Toshkent shahrida o‘tkazilishi rejalashtirilgan Hukumatlararo komissiyaning birinchi yig‘ilishi va yetakchi kompaniyalar ishtirokidagi biznes forumni yuqori natija bilan o‘tkazish zarurligi qayd etildi.
Uchrashuv yakunida tomonlar dolzarb xalqaro va mintaqaviy masalalar yuzasidan ham fikr almashdilar.