Janubiy Koreya harbiy razvedka agentligi (DIA) hisobotiga ko‘ra, Shimoliy Koreya (KXDR) Rossiyaga Ukrainadagi urush davomida taxminan 28 mingta konteynerda qurol-yarog‘ va artilleriya snaryadlari jo‘natgan.
"Agar bu hajm 152 mm o‘lchamdagi snaryadlar bilan hisoblanganda, yetkazilgan snaryadlar soni 12 milliondan oshadi", — deyiladi hisobotda.
Ukraina harbiy razvedkasi (GUR) rahbari Kirill Budanovning so‘zlariga ko‘ra, ayni paytda Rossiya armiyasidagi yirik kalibrli snaryadlarning yarmi Shimoliy Koreya ishlab chiqarishiga mansub.
Moskva Shimoliy Koreyadan o‘q-dori sotib olganini rasmiy ravishda tan olmagan, biroq urush boshida kuzatilgan “snaryadlar tanqisligi” haqidagi shikoyatlar hozirda deyarli yo‘qolgan.
Ma’lumot uchun, 2024-yilda Rossiya va Shimoliy Koreya o‘zaro harbiy yordamni ko‘zda tutuvchi shartnoma imzolagan. Bundan tashqari, Janubiy Koreya va Ukraina maxsus xizmatlari ma’lumotiga ko‘ra, Pxenyanning yaqin oylarda Rossiyaning Ukraina hujumlarini qo‘llab-quvvatlash uchun 25–30 mingga yaqin harbiy xizmatchi yuborishi ham mumkin.