Shri-Lanka O‘zbekiston mahsulotlarini jahon bozoriga chiqarish maqsadida o‘z portlaridan foydalanish imkonini taqdim etishga tayyorligini bildirdi. Bu taklif Kolombo shahrida bo‘lib o‘tgan muzokaralarda ilgari surildi.
Tomonlar o‘zaro savdo-iqtisodiy hamkorlikni chuqurlashtirish, transport-logistika sohasini rivojlantirish va agrar loyihalarni yo‘lga qo‘yish bo‘yicha “yo‘l xaritasi” ishlab chiqish masalasida kelishib oldi.
Uchrashuvda O‘zbekistonning Shri-Lankadagi elchisi Alisher To‘xtayev hamda Shri-Lanka savdo vaziri Vasanta Samarasinghe ikki davlat o‘rtasidagi savdo hajmini oshirish, kooperatsiyani kengaytirish va yangi bozorlarni o‘zlashtirish imkoniyatlarini muhokama qildi.
Rasmiy ma’lumotlarga ko‘ra, 2024-yil yakunida O‘zbekiston va Shri-Lanka o‘rtasidagi savdo hajmi 6 million AQSh dollarini tashkil etgan.
Shri-Lanka portlarining strategik joylashuvi O‘zbekiston uchun Hind okeani orqali tashqi savdo yo‘llarini ochib berishi mumkin. Bu tashabbus O‘zbekistonning logistika sohasidagi imkoniyatlarini kengaytirib, eksport-import xarajatlarini kamaytirishga xizmat qilishi kutilmoqda.