Шри-Ланка Ўзбекистон маҳсулотларини жаҳон бозорига чиқариш мақсадида ўз портларидан фойдаланиш имконини тақдим этишга тайёрлигини билдирди. Бу таклиф Коломбо шаҳрида бўлиб ўтган музокараларда илгари сурилди.
Томонлар ўзаро савдо-иқтисодий ҳамкорликни чуқурлаштириш, транспорт-логистика соҳасини ривожлантириш ва аграр лойиҳаларни йўлга қўйиш бўйича “йўл харитаси” ишлаб чиқиш масаласида келишиб олди.
Учрашувда Ўзбекистоннинг Шри-Ланкадаги элчиси Алишер Тўхтаев ҳамда Шри-Ланка савдо вазири Васанта Самарасингҳе икки давлат ўртасидаги савдо ҳажмини ошириш, кооперацияни кенгайтириш ва янги бозорларни ўзлаштириш имкониятларини муҳокама қилди.
Расмий маълумотларга кўра, 2024 йил якунида Ўзбекистон ва Шри-Ланка ўртасидаги савдо ҳажми 6 миллион АҚШ долларини ташкил этган.
Шри-Ланка портларининг стратегик жойлашуви Ўзбекистон учун Ҳинд океани орқали ташқи савдо йўлларини очиб бериши мумкин. Бу ташаббус Ўзбекистоннинг логистика соҳасидаги имкониятларини кенгайтириб, экспорт-импорт харажатларини камайтиришга хизмат қилиши кутилмоқда.