Surxondaryo viloyatining Jarqo‘rg‘on tumanida faoliyat yurituvchi advokat pora olayotgan vaqtda qo‘lga olindi.
Rasmiy ma’lumotlarga ko‘ra, advokat jinoyat ishlari bo‘yicha sudda ko‘rilayotgan ishda ayblanuvchiga yengil jazo tayinlatib berish uchun suddagi tanishlari orqali yordam berishini va’da qilib, 60 ming AQSh dollari talab qilgan.
Davlat xavfsizlik xizmati va prokuratura xodimlari tomonidan o‘tkazilgan tezkor tadbirda advokat 50 ming dollarni olayotgan paytda ashyoviy dalillar bilan ushlangan.
Unga nisbatan Jinoyat kodeksining 168-moddasi 4-qismi "a" bandi (firibgarlik) va 28, 211-moddasi 3-qismi "a" bandi (pora olishga suiqasd) bo‘yicha jinoyat ishi qo‘zg‘atilgan. Hozirda tergov harakatlari davom etmoqda, advokatga nisbatan qamoq ehtiyot chorasi qo‘llangan.