Bojxona organlari tomonidan respublikaga kuryerlik jo‘natmalari orqali kuchli ta’sir qiluvchi dori vositalarini noqonuniy olib kirishga bo‘lgan urinish fosh etildi.
Ma’lum qilinishicha, Bojxona qo‘mitasining “Toshkent-AERO” ixtisoslashtirilgan bojxona kompleksi hamda Surxondaryo viloyati bojxona boshqarmasi tezkor tuzilmalari tomonidan “Elektron tijorat” tashqi iqtisodiy faoliyat bojxona posti xodimlari, shuningdek, Davlat xavfsizlik xizmati, Ichki ishlar idoralari va Milliy gvardiya vakillari bilan hamkorlikda tezkor tadbir o‘tkazilgan.
Tezkor tadbir davomida Surxondaryo viloyatining Denov shahrida 30 yoshli fuqaro o‘z nomiga Koreya Respublikasidan yuborilgan kuryerlik jo‘natmasini qabul qilib olayotgan vaqtida qo‘lga olingan.
Tekshiruv jarayonida jo‘natma hujjatlarida sport ozuqasi — protein kukuni sifatida rasmiylashtirilgan bo‘lsa-da, mazkur kukun tarkibiga “pregabalin” moddasini o‘z ichiga olgan, kuchli ta’sir qiluvchi 1200 dona kapsulalar yashirilgani aniqlangan.
Hozirda mazkur holat yuzasidan tergovga qadar tekshiruv harakatlari olib borilmoqda.