"To‘g‘ri ishlayotgan, tushumlarini to‘liq ko‘rsatib, soliqlarini o‘z vaqtida to‘layotgan tadbirkorlar bir narsadan hotirjam bo‘lsin. Bunday tadbirkorlarni biz har tomonlama qo‘llab-quvvatlashni davom ettiramiz", - dedi Prezident bugungi yig‘ilishda.
Davlat rahbarining topshirig‘iga ko‘ra tadbirkorlarning ochiq-oshkora reytingi ishlab chiqildi. Endi ular faoliyatiga soliqchilar baho bermaydi, rag‘batlantirish choralari ham reyting asosida belgilanadi hamda bu tadbirkorlar kutayotgan adolatli yechim bo‘ladi.
Reytingi yuqori tadbirkorlar uchun:
- barcha soliq tekshiruvlari bekor bo‘ladi;
- qo‘shilgan qiymat solig‘i summasi bir kunda tekshiruvlarsiz qaytarib beriladi (hozir 7 kundan 30 kungacha);
- boshqa soliq turlari bo‘yicha ortiqcha to‘lov summasi uch kunda qaytarib beriladi (hozir 15 ish kunida);
- tovarlarni import qilishda va sotishda qo‘shilgan qiymat solig‘ini bojxona va soliq organlarida o‘zaro hisobga olish imkoniyati yaratiladi;
- tumanlarda auksionda olingan davlat aktivlari va yer uchastkalari qiymatini bo‘lib to‘lash muddati 3 yildan 5 yilgacha uzaytiriladi.
Har bir tadbirkor real vaqt rejimida o‘z o‘rni va bahosini bilib boradi. Savdo-sanoat palatasiga o‘z saytida reyting natijalarini onlayn e’lon qilib, tadbirkorlar so‘rovlariga tezkor javob berib borish zarurligi ko‘rsatib o‘tildi.