Tojikiston parlamentining quyi palatasi deputati Dilnoza Ahmadzoda voyaga yetmaganlarning ijtimoiy tarmoqlardan foydalanishini cheklash bo‘yicha tashabbus bilan chiqdi. Unga ko‘ra, 14 yoshgacha bo‘lgan bolalarning ijtimoiy tarmoqlardan foydalanishi to‘liq taqiqlanishi, 14–17 yoshdagi o‘smirlar esa faqat ota-onalarining yozma roziligi bilan ulardan foydalanishi mumkin bo‘ladi.
Deputat mazkur taklifini rasmiy “Xalq gazetasi”da e’lon qilingan maqolasida bayon etib, bolalar salomatligi va psixologik xavfsizligini ta’minlash uchun mavjud qonunchilikka qo‘shimcha o‘zgartirishlar kiritish zarurligini ta’kidladi.
Biroq raqamli texnologiyalar sohasi mutaxassislari bunday choralarni qat’iy taqiq shaklida joriy etishdan ko‘ra, ma’rifiy ishlar orqali muammoni hal qilishni maqsadga muvofiq deb hisoblashmoqda. Ularning fikricha, bolalarni internetdan butunlay uzib qo‘yish real yechim bo‘la olmaydi, aksincha, raqamli savodxonlikni oshirish va ota-onalar hamda pedagoglarni bu jarayonga faol jalb etish muhimdir.