Avvalroq Toshkent shahar IIBB tezkor xodimlari tomonidan 12 avgust kuni tezkor-qidiruv tadbiri doirasida bosqinchilik va boshqa jinoyatlar uchun gumonlanib olib kelingan fuqaro D.U. shu kuni IIBB maʼmuriy binosida vafot etgani haqida xabar berilgandi.
Bosh prokuratura maʼlumotlariga ko‘ra, D.U.ning o‘limi sababini aniqlash yuzasidan sud-tibbiyot ekspertizasi tayinlangan.
Ma'lum qilinishicha, D.U.ning vafoti yuzasidan bir qator tergov harakatlari o‘tkazish zarurati tug‘ilganligi sababli, holat yuzasidan Jinoyat kodeksining 206 (Hokimiyat yoki mansab vakolati doirasidan chetga chiqish) va 235 (Qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash) moddalari bilan jinoyat ishi qo‘zg‘atildi.
Hozirda Toshkent shahar prokuraturasi tomonidan dastlabki tergov harakatlari olib borilayotgani ma'lum qilingan.