Davlat xavfsizlik xizmati (DXX) va Ichki ishlar vazirligi (IIV) xodimlari hamkorligida mamlakatda kriminal vaziyatni barqarorlashtirish, tashkil etilgan jinoiy guruhlar va narkotik vositalar savdosiga qarshi 20-yanvardan boshlab keng ko‘lamli tezkor-qidiruv tadbirlari o‘tkazilmoqda. Bu haqda DXX Zamon.uzga xabar berdi.
Jumladan, Toshkent viloyati, Chinoz tumanida o‘tkazilgan tadbirda Bekobod shahrida yashovchi, 1980-yilda tug‘ilgan shaxs, ilgari narkotik vositalar savdosi bilan bog‘liq jinoiy javobgarlikka tortilgan, shartli xaridorga 200 g “gashish” moddasini 50 mln so‘mga sotgan vaqtida ashyoviy dalillar bilan ushlangan. Tezkor tadbir davomida ushbu shaxs 6,9 mln so‘mni 1989-yilda tug‘ilgan hamshahariga bergan paytida u ham ushlanib, uning yonidan 500 g “gashish” moddasiga ega bo‘lingan. Ular Jinoiy kodeksning 273-moddasi 5-qismi bilan ayblanib, tergov harakatlari olib borilmoqda.
Boshqa holatda esa, Bekobod tumanida Cobalt avtomashinasida yo‘lovchi sifatida ketayotgan, 1973-yilda tug‘ilgan Toshkent shahri fuqarosining yonidan 600 g “opiy” modda topilgan. Shaxs ushbu narkotik vositani Bekobod shahrida yashovchi, 1986-yilda tug‘ilgan tanishidan 5 ming AQSh dollari va 5 mln so‘mga sotib olgani aniqlangan.
Natijada, Bekobodlik narkosavdogarning yashash xonadonidan 1 kg 47 g “opiy” va uning ikki jinoiy sherigidan 335 g “opiy” moddas topilgan. Aniqlanishicha, ushbu narkotik vositalar Tожikistondan kontrabanda yo‘li bilan olib kelingan. Ular Jinoiy kodeksning 246-moddasi 2-qismi va 273-moddasi 5-qismi bilan ayblanmoqda.
Tezkor tadbirlar davom etmoqda va jinoyatchilikka qarshi kurash doimiy nazorat ostida amalga oshirilmoqda.