Toshkent shahrining ayrim tumanlarida gaz taʼminotidagi kuzatilgan uzilishlar sababli isitish sifatiga ham putur yetgan.
Maʼlum bo‘lishicha, issiqlik energiyasi “Toshissiqlikmarkaz” hamda “Toshkent IYES” (90%) va Veolia Energy Tashkent mahalliy qozonxonalarida tabiiy gazdan foydalangan holda ishlab chiqariladi (10%).
“Issiqlik parametrlari Veolia Energy Tashkentning harorat jadvaliga muvofiq o‘rnatiladi, undan keyin esa ishlab chiqarilgan jami issiqlik energiyasini kompaniya isteʼmolchilarga yetkazadi. Shu tariqa, shahar issiqlik taʼminoti korxonalariga bosimi pasaytirilgan gaz yetkazilib, o‘rnatilgan parametrlar to‘liq taʼminlanmayapti”, — deyiladi kompaniya xabarida.
Shuningdek, kompaniya vaziyatni yaxshilash uchun kuchaytirilgan rejimda ishlayotgani, mutaxassislar muammoli hududlarni aniqlash uchun joylarga borayotgani hamda issiqlik taʼminoti korxonalari bilan birgalikda issiqlik energiyasini qayta taqsimlash bo‘yicha ishlarni muvofiqlashtirayotgani qayd etilmoqda.
Avvalroq, Toshkentda gaz bosimi tushib ketgani, bu esa ayrim gaz quyish shoxobchalari faoliyatini vaqtincha to‘xtatgani haqida xabar berilgandi.
