Toshkent shahrida bir guruh blogerlarning yo‘l harakati qoidalarini buzgan holati aniqlandi. Ular ijtimoiy tarmoqlarda “ekstremal” kontent ortidan quvib, Shayxontohur tumanidagi chorraha yaqinida avtomobilni piyodalar zinapoyasidan tushirish bo‘yicha namoyishkorona harakat amalga oshirishgan.
Qoidabuzarlikda ishtirok etgan Lacetti rusumli avtomobil Mercedes-Benz shassisi qismlari bilan o‘zgartirilgani ma’lum bo‘ldi. Ushbu texnik o‘zgarish haydovchilarni transport vositasini noodatiy tarzda sinovdan o‘tkazishga undagan.
Videolavha ijtimoiy tarmoqlarda tarqalganidan so‘ng, yo‘l harakati xavfsizligi xizmati xodimlari qoidabuzarlarni aniqladi va ularga nisbatan ma’muriy chora ko‘rildi. Blogerlar bundan buyon bunday holatlarni takrorlamasliklarini bildirgan.