Toshkent shahri Olmazor tumanidagi kompyuter klubida sodir bo‘lgan mojaro oqibatida ikki nafar voyaga yetmagan o‘quvchi pichoqlab jarohatlandi. Bu haqda Toshkent shahar Ichki ishlar bosh boshqarmasi ma’lum qildi.
Ma’lumotlarga ko‘ra, 19 yoshli yigit kompyuter klubiga kirib, u yerda bo‘lgan o‘quvchilar bilan salomlashmagani sababli keskin ohangda gaplashgan. Orada kelib chiqqan tortishuv vaqtida u yonida bo‘lgan pichoq bilan ikki nafar o‘quvchiga tan jarohati yetkazgan.
Mazkur holat yuzasidan Jinoyat kodeksining 105-moddasi 2-qismi — ikki yoki undan ortiq shaxsga nisbatan qasddan o‘rtacha og‘ir tan jarohati yetkazish moddasi bilan jinoyat ishi qo‘zg‘atilgan. Gumonlanuvchi protsessual tartibda qamoqqa olingan.
Hozirda voqea yuzasidan tergov harakatlari davom ettirilmoqda.