“G‘afur G‘ulom” nomidagi madaniyat va istirohat bog‘ida taʼmirlash ishlari nihoyat yakuniga yetish arafasida. Bugundan bog‘ test rejimida faoliyat boshladi. Yaʼni o‘rnatilgan uskunalar aholi xavfsizligi uchun qayta-qayta sinovlardan o‘tkazilmoqda. Tozalash va tartibga keltirish ishlari olib borilmoqda.
Bog‘ning rekonstruksiya konsepsiyasi o‘zining yondashuvi bilan ajralib turadi.
“Biz faqatgina poytaxtning eng yirik yashil hududlaridan birini saqlab qolishni emas, balki hududni yangi va turli daraxtlar, butalar va gullaydigan o‘simliklar bilan to‘ldirishni ham o‘z oldimizga vazifa sifatida qo‘ygandik”, – deydi “G‘afur G‘ulom” bog‘i direktorining o‘rinbosari Zafar Mirzaulukov.
Bog‘ barcha rasta, kafe va kabob tayyorlaydigan joylardan tozalandi. Katta eʼtibor landshaft dizayniga qaratildi va bunda bog‘ maksimal darajada tabiiy bo‘lib, uyg‘unlik saqlab qolindi. Asosiysi, bog‘dagi daraxtlar to‘liq saqlab qolindi va sug‘orish tizimi to‘liq o‘zgartirildi.
“G‘afur G‘ulom” bog‘i “ekofrendli” uslubida yangilandi. Masalan, eng kichik tashrif buyuruvchilar uchun o‘yin maydonlarida xorijda ishlab chiqarilgan to‘liq tabiiy kompozitsion materiallardan bo‘lgan turli arqonli zinalar, qoyalar va kanatlar o‘rnatildi. Bog‘ga, yana bitta diqqatga sazovor narsa – charxpalak qaytarilgan. Ushbu attraksion yopiq kabinkalar va konditsionerlash tizimiga ega zamonaviy tarzda jihozlangan. Piyoda sayr qilish va yugurish yo‘laklariga joy bo‘shatish uchun bog‘da attraksionlar soni kamaytirilgan
Bog‘ hududida joylashgan ikkita ko‘l to‘la taʼmirlanib, gidrotizimlar to‘liq o‘zgartirildi, shuningdek, ko‘llarning atrofida plyaj zonalari va tabiat qurshovida dam olish uchun joylar yaratildi. Ko‘llarning birida qayiq va katamaranlar saqlab qolinmoqda, ikkinchi ko‘l esa o‘rdaklar uchun ajratilgan.
Avvalroq, mutasaddilarning maʼlumotiga ko‘ra bog‘ 24-oktyabr kuni faoliyat boshlashi, bundan tashqari bugun istirohat bog‘i poytaxtda kuzatilayotgan yomg‘irli ob-havo tufayli bir necha kundan so‘ng ochilishi haqida maʼlumot bergan edik.
