AQSH Yaqin Sharqdagi hamkorlari bilan Eronni tiyib turish maqsadida dengiz va havo dronlari guruhini tuzmoqchi. Bu haqda The Wall Street Journal gazetasi xabar berdi.
Nashrga ko‘ra, hozircha bu loyihaning ko‘lami va dronlardan foydalanish metodlari haqida maʼlumotlar ochiqlanmayapti. Ammo Vashington keyingi yil 100 ga yaqin razvedka dronlar bilan Suvayshdan turib Eron sohillarini kuzatishga umid qilyapti. Loyiha olti oydan buyon ishlab chiqilmoqda. Unda Saudiya Arabistoni va Isroil ham ishtirok etishi mumkin.
"Fikrimcha, biz uchuvchisiz texnologiyalar inqilobi ostonasida turibmiz", — degan AQSH floti kapitani Maykl Brasser.
Qo‘shimcha qilinishicha, qurilmalarga hech qanday qurol o‘rnatilmaydi. Qo‘shma Shtatlar kelajakda ushbu tajribadan dunyoning boshqa chekkalarida ham foydalanmoqchi.
Avvalroq Pentagon Suriyada Eron bilan bog‘liq guruhlarga hujum qilgandi.