Xitoyda birinchi bor odamsimon robot aspiranturaga o‘qishga kirdi. South China Morning Post nashri xabariga ko‘ra, Shanxay teatr akademiyasi “Xueba-01” nomli robotni rasmiy ravishda aspiranturaga qabul qilgan.
Mazkur robot Shanxay fan va texnologiya universiteti bilan DroidUp Robotics kompaniyasi hamkorligida ishlab chiqilgan. Ilmiy loyihaga ko‘ra, “Xueba-01” inson qiyofasiga yaqin ko‘rinishga ega bo‘lib, uning bo‘yi 175 sm ni tashkil etadi. Shuningdek, robot inson yuz ifodalarini taqlid qilish, xitoy tilida erkin muloqot qilish, murakkab topshiriqlarni bajarish imkoniyatlariga ega.
Yaratilgan robotning asosiy maqsadi — san’at va texnologiyalar tutashgan yo‘nalishlarda ilmiy-amaliy izlanishlar olib borishdan iborat. Shuningdek, robot bilan ishlash davomida sun’iy intellektning teatr va sahna san’atidagi qo‘llanish imkoniyatlari ham o‘rganiladi.