Xorazm viloyatining Xiva tumanidagi xususiy maktabgacha taʼlim muassasasida bolaga tan jarohati yetkazildi. Bu haqida viloyat Maktabgacha va maktab taʼlimi boshqarmasi xabar berdi.
Qayd etilishicha, mazkur muassasada rahbar lavozimida ishlab kelayotgan J.M. tayyorlov guruhiga rus tili fanidan qatnashib yurgan U.Sh. ni sheʼrni yodlab kelmaganligi uchun uning chap yelka sohasini qo‘li bilan qattiq siqib, tan jarohati yetkazgan.
Yuzaga kelgan holat bo‘yicha bolaning yaqinlari tomonidan Xiva tumani Ichki ishlar bo‘limiga murojaat qilingan va mazkur holat Xiva tuman IIB boshlig‘ining birinchi o‘rinbosari ishtirokida muhokama qilingan.
“Ayni paytda Xiva tuman IIB xodimlari tomonidan holat yuzasidan tergovgacha tekshiruv harakatlari olib borilmoqda”, deyiladi xabarda.