Ijtimoiy tarmoqlarda Xorazm viloyati Yangibozor tumanidagi 28-maktabda o‘qituvchilar maktabni tozalash ishlariga jalb qilingani haqida xabar tarqaldi. Holat yuzasidan Kambag‘allikni qisqartirish va bandlik vazirligi munosabat bildirdi.
Qayd etilishicha, tashkilot rahbari xodimlarni Mehnat kodeksining 115-moddasi (Ish vaqtining normal muddati)ga zid ravishda mehnat shartnomasida ko‘rsatilmagan, o‘z xizmat vazifalari doirasiga kirmaydigan ishlarga jalb qilgani aniqlangan.
Shu sababli unga nisbatan Maʼmuriy javobgarlik to‘g‘risidagi kodeksning 49-moddasi 1-qismi (Mansabdor shaxs tomonidan mehnat va mehnatni muhofaza qilish to‘g‘risidagi qonunchilikni buzish) bilan maʼmuriy jarima qo‘llangan. Bunda jarima miqdori bazaviy hisoblash miqdori (330 ming so‘m)ning 5 baravaridan 10 baravarigacha etib ko‘rsatilgan.