Kecha, 16-iyul kuni AOKAda Xalq ta’limi vazirligi Ichki audit xizmati faoliyatining joriy yil I yarim yillik natijalari sarhisobiga bag‘ishlangan matbuot anjumani bo‘lib o‘tdi.
Vazir o‘rinbosari Temur Komilov tomonidan berilgan ma’lumotlarga ko‘ra, joriy yilning birinchi yarim yilligi davomida o‘tkazilgan tadbirlar natijasida 270,4 mlrd. so‘mlik moliyaviy xato va kamchiliklarning oldi olinishiga erishilgan. Shu bilan birga, ta’lim muassasalarida o‘tkazilgan 524 ta nazorat tadbirlarida 37,7 mlrd so‘mlik qonun buzilish, shundan 10,4 mlrd so‘mlik pul mablag‘larini o‘zlashtirish holatlari aniqlangan.
Surxondaryo viloyati Denov tumanida o‘tkazilgan nazorat tadbirida ish haqiga nisbatan bankdan ortiqcha olingan 2,8 mlrd so‘m naqd pul mablag‘lari kassaga kirim qilinmasdan o‘zlashtirilishi, fuqarolarning shaxsiy kreditlarni so‘ndirish hamda omonatga joylashtirish orqali 6,9 mlrd so‘m mablag‘ talon-toroj qilingan.
Bakalavr va qayta tayyorlov diplomlari qalbakilashtirilishi hisobiga Jizzax viloyatida 1,9 mlrd so‘m, Sirdaryo viloyatida 1,8 mlrd so‘m, Buxoro viloyatida 1,4 mlrd so‘m, Qashqadaryo viloyatida 0,1 mlrd so‘m, jami 5,3 mlrd so‘m miqdoridagi byudjet mablag‘lari noqonuniy sarflangan.
“Xalq ta’limi tizimiga ajratilgan mablag‘lar respublika davlat byudjetidan tegishli tashkilotlarga ajratilgan eng katta miqdor ko‘rsatkichga ega — 30 trillion so‘mga yaqin. Shu boisdan tizimda aniqlanayotgan moliyaviy xato va kamchiliklar soni ham shunga mutanosib ravishda katta miqdorni tashkil qiladi”, — deydi Temur Komilov.
Joriy yilning olti oyi davomida moliyaviy qonun buzilish holatlariga yo‘l qo‘ygan 125 nafar mas’ul shaxslarga nisbatan qonunchilikda belgilangan tartibda intizomiy jazo choralari ko‘rilgan. Ularning 89 nafariga hayfsan e’lon qilingan, 16 nafariga jarima qo‘llanilgan, 20 nafar mas’ullar esa o‘z lavozimidan ozod etilgan.
Aniqlangan holatlar bo‘yicha huquqiy baho berish va qonuniy chora ko‘rish maqsadida tarkibida jinoyat alomatlari bo‘lgan 37,6 mlrd so‘mlik o‘rganish materiallari huquq-tartibot organlariga taqdim etilgan.
Eslatib o‘tamiz, bundan oldin Sog‘liqni saqlash vazirligi tizmida salkam 10 mlrd so‘m pul mablag‘lari talon-taroj qilingani xabar qilingandi.