O‘zbekistondagi Islom sivilizatsiyasi markazida yaratilgan “Yangi O‘zbekiston — Yangi Renessans poydevori” multimediaviy ekspozitsiyasi nufuzli xalqaro texnologik kompaniya Barco tomonidan sohaviy mukofot bilan taqdirlandi.
Mazkur loyiha madaniy makonda ilg‘or vizual texnologiyalarni badiiy yechimlar bilan uyg‘unlashtirgan eng muvaffaqiyatli namunalar qatorida e’tirof etildi. Ekspozitsiyada keng ko‘lamli 3D mapping, immersiv shou va raqamli sahnalashtirish texnologiyalari qo‘llanilib, tomoshabinlarda mintaqa tarixi hamda intellektual merosiga chuqur sho‘ng‘ish hissini uyg‘otadi.
Loyihaning ijodiy konsepsiyasi va vizual realizatsiyasi yirik multimediaviy sahnaviy loyihalar bilan tanilgan xalqaro ijodiy jamoa tomonidan amalga oshirildi. Markazning texnik mutaxassislari bilan hamkorlikda noyob audiovizual uslub ishlab chiqilib, badiiy g‘oya va zamonaviy texnologiyalar uyg‘unlashtirildi.
Ekspozitsiya doirasida yuqori texnologiyali Barco lazer proyektorlari qo‘llanilib, yuqori yorqinlik, rang aniqligi va tasvir barqarorligi ta’minlandi. Natijada markaz fasadi va ichki makonlari dinamik vizual maydonga aylantirilib, O‘zbekistonning jahon sivilizatsiyasiga qo‘shgan hissasi — buyuk allomalar davridan tortib zamonaviy taraqqiyot bosqichigacha — ifodalandi.
Ekspozitsiya davrlar izchilligini aks ettirib, madaniy va ilmiy tiklanishning strategik qarashlarini namoyon etadi. Qo‘lga kiritilgan mukofot loyiha yuqori professional darajada amalga oshirilganini tasdiqlab, Islom sivilizatsiyasi markazining xalqaro miqyosdagi zamonaviy madaniy-ilmiy platforma sifatidagi o‘rnini yanada mustahkamladi.
Ma’lumot uchun, Markaz buyurtmasi asosida Rossiyaning Sila Sveta kompaniyasi tomonidan yaratilgan mapping-shou 25 daqiqalik ijodiy loyiha bo‘lib, unda 47 ta yorug‘lik texnologiyasi qo‘llanildi. Loyiha ustida qariyb 100 nafar ijodiy va texnik mutaxassis hamda 50 nafar grafik dizayner ishlagan. Shou markaz tomonidan taqdim etilgan tarixiy va ilmiy materiallar asosida yaratilgan bo‘lib, har bir proyeksiya, rang va musiqiy element O‘zbekiston ilm-fani hamda madaniy merosini aks ettiradi.
Shouning muhim ramziy sahnalaridan biri — Qur’oni karim ochilish sahnasi va “Iqro” oyatlarining yangrashidir. Ushbu badiiy yechim ma’rifatning tarixdan kelajakka uzatilishini ifodalaydi.
Shou markaziy g‘oyasida inson va uning ilmiy merosi asosiy o‘rin tutadi. Proyeksiyalarda Ibn Sino, Xorazmiy, Imom Buxoriy, Amir Temur va Mirzo Ulug‘bek kabi buyuk siymolar aks ettirilgan.
Hozirda mapping-shou Xorazm hududida tajriba tarzida namoyish etilmoqda. Sinov natijalari asosida loyiha yanada takomillashtirilishi rejalashtirilgan.
Loyiha tarix va zamonaviy texnologiyalar uyg‘unligining yorqin namunasi sifatida baholanib, kelgusida yangi innovatsion yechimlarni joriy etish rejalashtirilgan.