Ushbu xat Xorazm viloyati Xalq taʼlimi boshqarmasi axborot xizmati tomonidan eʼlon qilindi.
Vazirlik umumtaʼlim maktablarida Yangi yil bayramini nishonlash bilan bog‘liq quyidagi holatlar taqiqlanganini maʼlum qildi:
yuqori sinf o‘quvchilari ishtirokida yangi yil bayramini nishonlash bilan bog‘liq tadbirlarni o‘tkazish;
bayram tadbirlarini o‘tkazish maqsadida ota-onalardan turli xil noqonuniy pul yig‘imlarini amalga oshirish;
maktab foyesi va sinf xonalarni sunʼiy archa va elektr chiroqlari bilan bezash.
Shuningdek, umumtaʼlim maktablarida Yangi yil bayramini nishonlash bilan bog‘liq quyidagi holatlarga ruxsat berildi:
istisno tariqasida faqatgina boshlang‘ich sinf o‘quvchilariga sinf rahbari hamda ota-onalar ishtirokida karantin qoidalariga rioya qilgan holda o‘z sinf xonalarida dars jarayonlariga halaqit bermagan holda bayram tadbirlarini o‘tkazishga;
maktab foyesi va sinf xonalarni faqatgina o‘quvchilar qo‘l mehnati bilan yasalgan turli bezaklar bilan bezatishga;
maktab hovlisida Yangi yil archasini bezashga.
Eslatib o‘tamiz, avvalroq maktab o‘quvchilari uchun qishki taʼtil 28 dekabrdan boshlanishi haqida xabar berilgandi.