Toshkent viloyatining Yangiyo‘l shahrida yashovchi fuqaro itlarni go‘shti uchun o‘ldirib kelgani aniqlanib, huquqni muhofaza qiluvchi organlar tomonidan ushlandi. Avvalroq ushbu holat ijtimoiy tarmoqlarda tarqalib, jamoatchilikda keskin munozaralarga sabab bo‘lgan edi. Holat yuzasidan viloyat IIBB munosabat bildirdi.
Viloyat Ichki ishlar bosh boshqarmasi ma’lumotiga ko‘ra, voqea 2025-yil sentyabr oyida Yangiyo‘l shahri “Sabo” mahallasida sodir etilgan. 27 yoshli fuqaro o‘ziga tegishli itni qasddan o‘ldirgani aniqlangan.
Hozirda mazkur shaxsga nisbatan Ma’muriy javobgarlik to‘g‘risidagi kodeksning 111-moddasi asosida hujjatlar rasmiylashtirilgan. U ushlangan bo‘lib, dastlabki tergovga qadar tekshiruv ishlari olib borilmoqda.
Eslatib o‘tilishicha, amaldagi qonunchilikka ko‘ra hayvonlarga nisbatan shafqatsiz munosabat uchun 1,2 million so‘mdan 2 million so‘mgacha jarima belgilangan. Agar bunday holat takror sodir etilsa, jarima miqdori 20 million so‘mgacha yetishi yoki 6 oygacha ozodlikdan mahrum etish jazosi qo‘llanishi mumkin.