Тошкент вилоятининг Янгийўл шаҳрида яшовчи фуқаро итларни гўшти учун ўлдириб келгани аниқланиб, ҳуқуқни муҳофаза қилувчи органлар томонидан ушланди. Аввалроқ ушбу ҳолат ижтимоий тармоқларда тарқалиб, жамоатчиликда кескин мунозараларга сабаб бўлган эди. Ҳолат юзасидан вилоят ИИББ муносабат билдирди.
Вилоят Ички ишлар бош бошқармаси маълумотига кўра, воқеа 2025 йил сентябрь ойида Янгийўл шаҳри "Сабо" маҳалласида содир этилган. 27 ёшли фуқаро ўзига тегишли итни қасддан ўлдиргани аниқланган.
Ҳозирда мазкур шахсга нисбатан Маъмурий жавобгарлик тўғрисидаги кодекснинг 111-моддаси асосида ҳужжатлар расмийлаштирилган. У ушланган бўлиб, дастлабки терговга қадар текширув ишлари олиб борилмоқда.
Эслатиб ўтилишича, амалдаги қонунчиликка кўра ҳайвонларга нисбатан шафқатсиз муносабат учун 1,2 миллион сўмдан 2 миллион сўмгача жарима белгиланган. Агар бундай ҳолат такрор содир этилса, жарима миқдори 20 миллион сўмгача етиши ёки 6 ойгача озодликдан маҳрум этиш жазоси қўлланиши мумкин.