Yaponiya qishloq xo‘jaligi vaziri Taku Eto iste’foga chiqdi. Bunga uning guruch haqida aytgan oddiy, ammo ijtimoiy jihatdan og‘riqli gapi sabab bo‘ldi. Yakshanba kuni u "hech qachon guruch sotib olmaganman, uni tarafdorlar sovg‘a qiladi" degan edi. Bu so‘zlar aholining guruch narxi bilan bog‘liq og‘ir ahvoli fonida aytilgani uchun keskin tanqidga uchradi. Bugun Yaponiyada guruch narxi rekord darajaga chiqib, har bir uy bekasining savatidagi asosiy mahsulotga aylangan.
Vazir kechirim so‘rab, iste’foga chiqdi. “Narxlar oshib borayotgan paytda bunday noo‘rin gap aytganimdan afsusdaman,” dedi Eto jurnalistlarga. Bu — Bosh vazir Shigeru Ishiba rahbarligi ostidagi hukumatda ro‘y bergan ilk iste’fo bo‘ldi. Ayni vaqtda Liberal-demokratik partiya milliy saylovlarga tayyorgarlik ko‘rayotgan bir paytda, bu siyosiy muammo partiya obro‘siga qattiq zarba bo‘lishi mumkin.
Ishiba vazirlikka tezda yangi nomzodni tayinladi — sobiq atrof-muhit vaziri, taniqli siyosatchi Shinjiro Koizumi. Uning aytishicha, bosh vazir unga “birinchi navbatda guruch masalasini hal qilish” topshirig‘ini bergan. “Oddiy odamlar bu vaziyatdan charchagan. Men ham farzandlarimga tez tayyorlanadigan guruch beraman. Bu og‘irlikni yuragimda his qilaman,” dedi Koizumi.