Buyuk Britaniyada Yevroparlamentning sobiq deputati, uelslik siyosatchi Natan (Neytan) Gill Rossiya Federatsiyasining Yevropadagi siyosiy manfaatlari uchun xizmat qilgani va pora olgani uchun 10 yil 6 oy muddatga ozodlikdan mahrum etildi. Bu haqda Londonning Old Beyli sudida 21-noyabr kuni o‘qilgan hukmdan so‘ng Skotland-Yard rasmiy bayonot berdi.
Sudya Bobbi Cheema-Grubbning ta’kidlashicha, Gill Yevroparlament a’zosi bo‘lgan davrida “davlat vakili sifatida o‘z vazifalarini buzgan holda haq evaziga xizmat ko‘rsatgan” hamda Ukraina bo‘yicha Moskva narrativlariga mos keluvchi bayonotlarni ataylab ilgari surgan. Sudya bu harakatlar Buyuk Britaniya milliy xavfsizligiga tahdid solganini qayd etdi.
52 yoshli siyosatchi sentyabr oyida 2018-yil dekabridan 2019-yil iyuligacha olgan noqonuniy to‘lovlar bilan bog‘liq sakkizta poraxo‘rlik epizodini tan olgan. Prokuror Mark Xeyvudga ko‘ra, Gill pora evaziga Yevroparlamentdagi aloqalaridan foydalanib, muayyan masalalarni ko‘targan va Rossiya manfaatiga xizmat qiluvchi tadbirlarni tashkil etgan.
Tergov davomida aniqlanishicha, Gill pulni rossiyaparast pozitsiyalari bilan tanilgan, Ukrainadagi “Oppozitsiya platformasi — Hayot uchun” partiyasining sobiq deputati Oleg Voloshindan olgan. Voloshin Ukraina sharqidagi “DXR” va “LPR” tuzilmalarini oqlovchi chiqishlari bilan tanilgan bo‘lib, 2022-yilda AQSh sanksiya ro‘yxatiga kiritilgan.
U 2023-yilda Ukrainada davlatga xiyonatda ayblangan, biroq hujum boshlanishidan oldin mamlakatni tark etgani aniqlangan. Mahalliy OAV uning Belarusda yashayotgani haqida xabar bergan.
Voloshinning Germaniyaning o‘ng qanot populistik AfD partiyasi vakili Maksimilian Krah bilan aloqa qilgani haqida ham ma’lumotlar mavjud. Der Spiegelning yozishicha, AQSh razvedkasi ularning yozishmalarini qo‘lga kiritgan bo‘lib, unda Voloshin tomonidan “ma’lum topshiriqlar uchun kompensatsiya” taklif qilingani qayd etilgan.
Krah hozirda Xitoy bilan bog‘liq korrupsiya gumoni tufayli Bundestag tomonidan daxlsizlik huquqidan mahrum qilingan.