Буюк Британияда Европарламентнинг собиқ депутати, уэлслик сиёсатчи Натан (Нейтан) Гилл Россия Федерациясининг Европадаги сиёсий манфаатлари учун хизмат қилгани ва пора олгани учун 10 йил 6 ой муддатга озодликдан маҳрум этилди. Бу ҳақда Лондоннинг Олд Бейли судида 21 ноябрь куни ўқилган ҳукмдан сўнг Скотланд-Ярд расмий баёнот берди.
Судья Бобби Чеэма-Груббнинг таъкидлашича, Гилл Европарламент аъзоси бўлган даврида “давлат вакили сифатида ўз вазифаларини бузган ҳолда ҳақ эвазига хизмат кўрсатган” ҳамда Украина бўйича Москва нарративларига мос келувчи баёнотларни атайлаб илгари сурган. Судья бу ҳаракатлар Буюк Британия миллий хавфсизлигига таҳдид солганини қайд этди.
52 ёшли сиёсатчи сентябрь ойида 2018 йил декабридан 2019 йил июлигача олган ноқонуний тўловлар билан боғлиқ саккизта порахўрлик эпизодини тан олган. Прокурор Марк Хейвудга кўра, Гилл пора эвазига Европарламентдаги алоқаларидан фойдаланиб, муайян масалаларни кўтарган ва Россия манфаатига хизмат қилувчи тадбирларни ташкил этган.
Тергов давомида аниқланишича, Гилл пулни россияпараст позициялари билан танилган, Украинадаги “Оппозиция платформаси — Ҳаёт учун” партиясининг собиқ депутати Олег Волошиндан олган. Волошин Украина шарқидаги “DXR” ва “LPR” тузилмаларини оқловчи чиқишлари билан танилган бўлиб, 2022 йилда АҚШ санкция рўйхатига киритилган.
У 2023 йилда Украинада давлатга хиёнатда айбланган, бироқ ҳужум бошланишидан олдин мамлакатни тарк этгани аниқланган. Маҳаллий ОАВ унинг Беларусда яшаётгани ҳақида хабар берган.
Волошиннинг Германиянинг ўнг қанот популистик АфД партияси вакили Максимилиан Краҳ билан алоқа қилгани ҳақида ҳам маълумотлар мавжуд. Дер Спиегелнинг ёзишича, АҚШ разведкаси уларнинг ёзишмаларини қўлга киритган бўлиб, унда Волошин томонидан “маълум топшириқлар учун компенсация” таклиф қилингани қайд этилган.
Краҳ ҳозирда Хитой билан боғлиқ коррупция гумони туфайли Бундестаг томонидан дахлсизлик ҳуқуқидан маҳрум қилинган.