Тошкент вилоятида 20 ёшли йигит Россия армиясига ёлланиб, жиноий жазога тортилди. Zamon.uz суд ҳужжати билан танишди.
Суд ҳукмида келтирилишича, Бекобод шаҳрида яшовчи, 2006 йилда туғилган Д.Х. ишлаб келиш мақсадида 2025 йил 25 май куни Москвага келган. Уни шу ерда ишлаётган онаси ва укаси кутиб олган. Оила пойтахтнинг Пушкино шаҳридаги “Озон” омборида ишлаган. Июл ойида ушбу корхонада фақат Россия фуқаролари ишлаши мумкинлиги белгиланганидан кейин Д.Х. Telegramʼдаги “Москвада иш бор” каналидан ҳайдовчилик бўйича иш топган. Йигит эълон эгасига қўнғироқ қилганда, андижонлик Акбар Владивостокда киракашлик қилиш кераклигини, ойлик маош 100 000 рублдан 150 000 рублгача бўлишини тушунтирган. Йигит онасининг қаршилигига қарамасдан, чипта олиб шаҳарга учган. Акбар ҳамюртига аеропорт яқинидаги автомобилни миниб шаҳар марказига боришни буюрган. Д.Х. “Toyota Aqua”да айтилган манзилга бориб меҳмонхонада 3 кун яшаган. 4-куни Акбар унга қўнғироқ қилиб аеропорт томонда Артёмда “гречка” борлигини, уни Находка шаҳрига етказишни айтган.
“Шу куни 100 грамм сариқ пакетга ўралган оқ рангдаги “гречка”ни бошқа бир андижонлик Азизга олиб бориб бердим, кейин Акбар менга иш ҳақи сифатида 30 000 рубл берди. Шу тариқа, Акбарнинг топшириғи билан доимий равишда Артёмдан психотроп воситаларни олиб айтилган манзилларга таширдим. Локациясини Акбарга жўнатиб турардим. Дастлаб, 100 грамм, кейин 1 кгдан 3 кггача бўлган товарларни “доставка” қилардим. Шу орада, Акбар мендан 140 000 рубл қарз бўлиб қолди ва ишламаслигимни айтдим. У 3-4 кунда иш бўлишини, сўнгра қарзини узишини билдирди”, - дейди Д.Х. суддаги кўрсатмасида.
Бекободлик йигит Находка шаҳрида Акбар орқали андижонлик Зуҳриддин ва Жасур билан танишган.
“Акбар Ўзбекистондаги, Жасур Находка шаҳридаги “куратор” экан. 18 август куни Акбар қарзини жўнатиб, товар борлигини айтди, уни Находка шаҳри Ленин кўчасига олиб боришимни айтди. Юкнинг эгаси сени топиб олади деди. Эртаси куни айтилган манзилга 5 кг 400 грамм “гречка”ни олиб бордим, шу маҳал дўконга кириб чиқдим, онам билан гаплашдим. Шу пайт ортимдан ҳуқуқни муҳофаза қилувчи орган ходимлари келиб мени урди, телефонимни кўздан кечирди, машинадаги психотроп воситаларни просессуал тартибда расмийлаштириб, Находка шаҳридаги милиция бўлимига олиб боришди. Жиноят Кодексининг 228-моддаси билан жиноят иши қўзғатиб, қамаб қўйишди, 9 кун мобайнида терговда бўлдим”- дейди у.
Сўнгра, Д.Х. Владивостокнинг Уссурийский шаҳридаги 2-сонли тергов ҳибсхонасига жўнатилган, у ерда бухоролик ва андижонлик 2 ватандоши билан бир хонада ўтирган. Суҳбат давомида бекободлик йигит Акбарнинг “доставка”ларини ёлғиз ўзи ташимаганини билган. Орадан кўп вақт ўтмай, ходимлар Д.X.гa урушда қатнашиш эвазига, озодлик таклиф этишган. Тергов жараёнларида унга сурхондарёлик эркак таржимонлик қилиб, умрбод қамалиб кетмаслик учун розилик беришга ундаган. Натижада, Д.Х. ҳарбий хизмат ҳақидаги шартномани имзолаган.
“Шундан сўнг, Уссурийский шаҳридаги ҳарбий қисмга юборишди, у ерда 200 нафардан ортиқ турли давлат фуқаролари Украинага қарши урушга тайёрланаётган экан. Уларнинг орасида ўзбеклар ҳам бор эди. 2 ҳафта 3 нафар ўзбекистонлик билан ҳарбий машғулотлардан ўтдик”, - дейди Д.Х.
2025 йилнинг октябрида эса Д.Х. ва бошқалар Запорижжя вилояти ҳудудидаги ҳарбий полигонига юборилган. У ерда жанговор қурол, ўқ-дори ва ҳарбий техникалардан фойдаланиш ўргатилган.
“Кейин 250 000 рубл ойлик маош деб пластик картамга ташлаб беришди. Полигонда танк ўқловчиси вазифасида хизмат қилдим. Ҳарбий тайёргарликлар жараёнида кўричак бўлиб қолдим ва йўлланма орқали Ростов шаҳридаги ҳарбий госпиталда операция қилишди, 9 кун давомида даволандим, кейин дўконга чиқиш баҳонасида Ростов шаҳри марказига яширинча чиқиб, таксига ўтириб, ҳайдовчидан ёрдам сўрадим, урушга мажбуран юборилганимни айтдим, кейин у мени Москвага олиб бориб қўйди”, - дейди у кўрсатмасида.
Онаси ва укаси билан кўришган Д.Х. Москвада 4 кун даволаниб, Ватанга қайтиш гувоҳномаси билан Ўзбекистонга келган.
ЖИБ Бекобод шаҳар судининг 2026 йил 21 январдаги ҳукми билан Д.Х. Жиноят Кодексининг 154-моддаси (ёлланиш) билан айбли деб топилди. Унга 5 йил муддатга озодликдан маҳрум қилиш жазоси тайинланди. Уни умумий тартибли колонияларда ўтаттириш белгиланди.
Эслатиб ўтамиз, сал олдин самарқандлик йигит ҳам наркотик ортидан Россия армиясига ёллангани ҳақида ёзган эдик.