Оғир атлетика бўйича жаҳон чемпионатининг охирги кунги баҳслари бўлиб ўтди.
Унда -109 кг вазн тоифасидаги спортчилар беллашувларда иштирок этди. Ушбу вазнда баҳс олиб борган ҳамюртларимиз Руслан Нуридинов ва Акбар Жўраевлар ажойиб натижаларни қайд этишди. Дастлаб, даст кўтариш машқларида Руслан Нуридинов 185 кг натижа билан учинчи ўринни қўлга киритган бўлса, Акбар Жўраев 195 кгли тошни буйсундириб олтин медални қўлга киритди.
Силтаб кўтариш беллашувларида ҳам мухлислар ҳамюртларимизнинг ўзаро тўқнашувига гувоҳ бўлишди. Унда Акбар Жўраев 238 кг натижа билан олтин медални қўлга киритган бўлса, Руслан Нуридинов 236 кг натижа билан кумуш медаль соҳибига айланди. Учинчи ўринни 228 кг натижа билан арманистонлик Симон Мартиросян эгаллади.
Шу тариқа Тошкентда ўтказилган оғир атлетика бўйича жаҳон чемпионати ўз якунига етди.