Бугун, 8 апрель куни Ўзбекистон халқ артисти Мурод Ражабов оламдан ўтди. Бу ҳақда Маданият вазирлиги маълум қилди.
Таниқли актёр, ўзбек кино хазинасидан жой олган бир қатор фильмлардаги роллари билан томошабинлар меҳрини қозонган санъаткор узоқ давом этган хасталикдан сўнг 74 ёшида вафот этган.
Мурод Ражабов 1949 йилнинг 30 май куни Тошкент шаҳрида туғилган. 1971 йилда Тошкент санъат институтини тамомлаган актёр фаолияти давомида ўзбек халқи учун қадрдон бўлиб қолган, қатор кинофильмларда суратга тушган.
“Ажойиб хаёлпараст”, “Тўйлар муборак”, “Темир хотин”, “Темир эркак”, “Кичкина табиб”, “Кўзларинг маъюс”, «Улфатлар», “Келгинди куёв”, “Хавфли бурилиш”, «Кечир», “Супер келинчак”, «Ичкуёв», «Киракаш» каби фильмлар шулар жумласидандир.
У 2008 йилда Ўзбекистон халқ артисти унвони билан тақдирланган.