Маълум бўлишича, қотиллика қўл урган шахс 2020 йилда бош мия қон томири касаллиги билан оғриган ва вилоят психоневрология диспансери ҳисобига олинган. Шундан сўнг, у ерда стационар тартибда даволаниб, акаси ва янгаси билан бир уйда яшаб келган. Zamon.uz суд ҳужжати билан танишиб чиқди.
Суд ҳужжатига кўра, ака ва унинг хотини укасига руҳий касалликлар шифохонасига жойлаштириш ҳақида айтган. Судланувчи A.Б. бундан нафратланиб, уларни ўлдириш пайига тушган.
Мудҳиш воқеа 2025 йил 18 октябрь куни Андижон шаҳри “Чўлпон юз йиллиги” МФЙда юз берган. Ука ҳовлида турган болтанинг кесувчи қисми билан акасининг бошига зарба бериб, ўлимига сабабчи бўлган. Сўнгра, у уйда яшириниб олган янгасини ўлдириш учун эшик ойнасини синдирган ва ўша пайтда болта сопидан чиқиб кетган. Шундан кейин ука болға билан уйга кириб, янгасининг бошига бир неча маротаба урган. Аёл хонадан ташқарига чиқиб, атрофдан ёрдам сўраган. Қўшни аёл ёрдамга келиб, A.Б.нинг қўлидаги болғани олиб қўйишга эришган.
Судга оид психиатрия экспертизаси хулосасига кўра, судланувчи A.Б. жиноят содир этаётган пайтда ўз ҳаракатларининг аҳамиятини англай олмаган. Шунингдек, хулосада тўғри кўрсатув бериш, гувоҳлантириш ва бошқа тергов ҳамда суд ҳаракатларида иштирок этишга қодир эмас деб топилиб, Республика кузатуви кучайтирилган руҳий касалликлар шифохонасида мажбурий даволаниш тавсия этилган.
Судда марҳумнинг ўғли M.Б. кўрсатма бериб, амакиси 2006 йилдан буён руҳий касаллик билан оғриб келишини билишини, судланувчига қонуний жавобгарлик белгилашни, моддий ёки маънавий зарарлар бўйича даъвоси йўқлигини билдирган.
ЖИБ Андижон шаҳар судининг 18 декабрдаги ажрими билан, судланувчи A.Б. жиноятни ақли норасо ҳолатда содир этган деб топилиб, қамоққа олиш тарзидаги эҳтиёт чораси бекор қилинди. Шунингдек, A.Б.нинг Республика кузатуви кучайтирилган руҳий касалликлари шифохонасида мажбурий тартибда даволаниши белгиланди.