Андижон вилояти Избоскан туманидаги 11-мактабда ўқувчининг таёқ билан калтаклангани акс этган видео ижтимоий тармоқларда кенг муҳокамаларга сабаб бўлди. Кейинчалик аниқланишича, болага зўравонлик қилган шахс мазкур мактаб директорининг ўринбосари бўлган.
Мактабгача ва мактаб таълим вазирлиги маълумотига кўра, педагог ва ўқувчи ўртасидаги муносабатларга зид бўлган ушбу ҳаракат учун директор ўринбосарига ҳайфсан интизомий жазоси қўлланилган. Шу билан бирга, вазирлик ҳолат юзасидан ўрганиш ишлари давом этаётганини билдирди.
Қайд этилишича, воқеа 23 январь куни соат 10:00 атрофида мактаб ҳудудида содир бўлган. Видеолавҳада директор ўринбосари А. Қ. ўқувчиларни дарсга киритиш жараёнида мактаб ёшидаги болага қўпол муносабатда бўлиб, уни ураётгани акс этган.
Сўнгги вақтларда таълим муассасаларида зўравонлик билан боғлиқ ҳолатлар кўпайиб бораётгани жамоатчиликда хавотир уйғотмоқда. Аввалроқ Тошкент вилоятида ўқитувчи ўқувчини китоб билан ургани учун ишдан олинган, Сурхондарё вилоятида эса педагог ўқувчини уриб, унинг елкасини синдиргани ҳақида хабарлар тарқалган эди.