Доналд Трамп президентлик лавозимидаги биринчи йил давомида Америка Қўшма Штатлари ҳудудидан қарийб 3 миллион нафар ноқонуний муҳожир депортация қилинди. Бу ҳақда АҚШ Ички хавфсизлик вазири Кристи Ноэм ТАСС агентлигига берган изоҳида маълум қилди.
Вазирнинг таъкидлашича, ушбу мигрантларнинг 2,2 миллион нафари “ўзини ўзи депортация қилиш” дастури доирасида мамлакатни ихтиёрий равишда тарк этган. Яна 675 мингдан ортиқ шахс эса мажбурий тартибда депортация қилинган.
Қайд этилишича, бу кўрсаткичлар Трамп маъмуриятининг ноқонуний иммиграцияга қарши олиб борилган қатъий сиёсати натижасидир. Президент Трамп бир неча бор лавозимга киришидан аввал АҚШга тахминан 25 миллион киши ноқонуний йўл билан кирганини таъкидлаган.
2025 йил 20 январ куни АҚШнинг 47-президенти сифатида инаугурация маросимидан сўнг Доналд Трамп иммиграция сиёсатини кескинлаштиришга қаратилган бир қатор чораларни амалга оширди. Жумладан, АҚШ–Мексика чегарасида фавқулодда ҳолат жорий этиш тўғрисидаги фармон имзоланди.