Бразилия президенти Луиз Инациу Лула да Силва АҚШни Украинага ҳарбий ёрдам беришни тўхтатишга чақирди.
Унинг сўзларига кўра, АҚШ урушни рағбатлантиришни тўхтатиб, тинчлик ҳақида гапира бошлаши керак. Шунингдек, Бразилия раҳбари бу гап Европа Иттифоқига ҳам тегишли эканини айтди.
“Шу тариқа халқаро ҳамжамият Россия президенти Владимир Путин ва Украина етакчиси Владимир Зеленскийни тинчлик бутун дунё манфаатларига мос келади деб ишонтира олади”, — деди Лула.
Аввалроқ Лула да Силва урушни тугатиш учун Қримни Россияга беришни таклиф қилганди. Бунга жавобан Украина ТИВ Бразилия президентининг Россия агрессиясини тўхтатиш бўйича ечим топиш борасидаги саъй-ҳаракатларини қадрлашини, бироқ у ўз ҳудудлари билан савдо қилмаётганини эслатишга мажбур эканлигини билдирди.