АҚШ ва Украина Украинани қайта тиклаш бўйича қиймати 800 миллиард долларни ташкил этувчи йирик келишувни имзолаши мумкин. Бу ҳақда The Telegraph нашри ўз манбаларига таяниб хабар берди.
Маълум қилинишича, мазкур битим 19–23 январь кунлари Швейцариянинг Давос шаҳрида бўлиб ўтадиган Жаҳон иқтисодий форумида имзоланиши режалаштирилган. Форум доирасида АҚШ президенти Доналд Трамп ва Украина президенти Владимир Зеленскийнинг учрашуви ҳам кутилмоқда.
Аввалроқ Зеленский ушбу келишувни, жумладан хавфсизлик масалаларини Оқ уйда муҳокама қилишни режалаштирган эди. Бироқ Европа давлатлари етакчилари учрашувни Давосдаги халқаро форум доирасида ўтказишни таклиф қилган.
Режага кўра, кейинги 10 йил давомида кредитлар, грантлар ва хусусий инвестициялар ҳисобидан тахминан 800 миллиард доллар маблағ жалб этилиши кўзда тутилган.
Украина расмийлари АҚШнинг мамлакат иқтисодий тикланишида фаол иштироки Вашингтон томонидан хавфсизлик кафолатлари тақдим этилиш эҳтимолини оширишига умид қилмоқда.
Хабарларга кўра, дунёдаги энг йирик инвестиция компанияларидан бири — BlackRock ҳам ушбу дастурда иштирок этиши мумкин. Келишувнинг аниқ шартлари ҳозирча ошкор этилмаган.