АҚШ расмийлари 2026 йилда ноқонуний муҳожирларни мамлакатдан депортация қилиш суръати ва кўламини янада оширишни режалаштирмоқда. Бу ҳақда АҚШ Ички хавфсизлик департаменти (DHS) баёнотига таяниб ТАСС хабар берди.
Департамент маълумотларига кўра, 2025 йил давомида АҚШ ҳуқуқни муҳофаза қилиш органлари томонидан 2,5 миллиондан ортиқ ҳужжатсиз мигрант мамлакат ҳудудидан чиқариб юборилган. Расмийларнинг қайд этишича, ушбу натижаларга ноқонуний иммиграцияга қарши қатъий чоралар ҳисобига эришилган.
DHS ҳисоботида таъкидланишича, қисқа муддат ичида бундай кўрсаткичга эришилиши АҚШ президенти Доналд Трамп ҳамда Ички хавфсизлик вазири Кристи Ноем томонидан ноқонуний иммиграцияга қарши сиёсатни кучайтириш натижасидир.
Департамент вакиллари бу жараён эндигина бошланганини алоҳида урғулаган.
Шунингдек, Ички хавфсизлик департаменти Трамп маъмурияти ноқонуний иммиграцияга қарши курашиш учун янги қонунларни қабул қилиш зарур деб ҳисобламаётганини билдирди. Уларнинг фикрича, аввалги — Байден маъмурияти даврида юмшатилган иммиграция қоидаларини амалда қатъий ижро этишнинг ўзи етарли бўлган.