Аввалроқ Қирғизистонда Президент Садир Жапаровнинг беш йиллик раҳбарлик фаолиятига бағишланган тўрт қисмли "Президент" ҳужжатли фильми намойиш этилгани ҳақида хабар берилган эди.
Унда Қирғизистон президенти Садир Жапаров қирғиз–тожик чегарасида юзага келган кескин вазиятга тўхталиб, мазкур масалага ечим топилишида Ўзбекистон президенти Шавкат Мирзиёевнинг маслаҳатлари ва вазмин дипломатик ёндашуви муҳим аҳамият касб этганини таъкидлаган.
Шу билан бирга, Қирғизистон президенти Садир Жапаровнинг беш йиллик фаолиятига бағишланган ҳужжатли фильмда Миллий хавфсизлик давлат қўмитаси раиси Қамчибек Ташиев ҳам Ўзбекистон билан чегара масалаларини ҳал қилиш жараёни осон кечмаганини очиқ тан олди. Унинг айтишича, айрим пайтларда музокаралар кескин тортишувларга ҳам сабаб бўлган.
Ташиев Ўзбекистон бош вазири Абдулла Арипов билан музокаралар чоғида жиддий келишмовчиликлар юзага келганини эслаб ўтди. “Бир пайт Арипов билан келиша олмадик. Яхши-ёмон гаплар бўлди, урушиб кетдик. У ҳам кетди, мен ҳам кетдим. Кейин у “кел, гаплашайлик” деди, лекин мен “йўқ, гаплашмайман”, деб туриб олдим”, — дея ҳикоя қилди у.
Унинг сўзларига кўра, айнан шу вазиятда икки томон ўртасидаги музокаралар бутунлай тўхтаб қолиш хавфи остида қолган. Агар давлат раҳбарлари шахсан аралашмаганида, жараён давом этмаслиги мумкин эди.
“Президентимиз ўртага тушди. Икки давлат раҳбарлари “урушманглар, талашманглар, ўтириб келишиб олинглар” деб чақирди. Шундан кейин музокаралар яна давом этди”, — деди Ташиев.
У ушбу жараёнлар ҳақида сўзлар экан, Қирғизистон ва Ўзбекистон ўртасидаги чегара масаласини ҳал этишда раҳбарларнинг қатъий сиёсий иродаси, ўзаро ишонч ва сабр ҳал қилувчи омил бўлганини алоҳида таъкидлади.