Хонанда Фарруҳ Раимов оиласи барбод бўлганини айтиб, президентдан ёрдам сўради. Бу ҳақда у ўзининг ижтимоий тармоқдаги саҳифасида видеомурожаат эълон қилди, дея ёзмоқда “Darakchi.uz” нашри.
“Юртимизда 10-15 йилдан бери байрам тадбирларида оилавий хизмат қиламиз. Орттирган пулимизга яшаш учун жой сотиб олган эдик. Ўша ерни ўзидан-ўзи “кўтариб” бўлмайди. Ўша вақт маблағимиз етарли эмас эди.
Бу ерни сотиб, биринчи бизнесимиз, яъни тадбиркорлик билан шуғулланиб кўрайлик деган мақсадда техник кўрик очишни режалаштирдик. Давлат аккредитация марказидан 4 ой давомида имтиҳондан ўтиб, энди рухсатнома олиб, ишни бошлаймиз деганимизда техник кўрикнинг баъзи шартлари ўзгарди. Бизнинг ишимиз тўхтаб, банкротга учрадик”, — дейди Раимов.
Хонанданинг сўзларига кўра, мазкур муаммо оиласининг бузилишига ҳам сабаб бўлди.
“Сарфлаган пулларимизнинг ҳаммаси ҳавога учиб кетди. Шундан озгина вақт ўтгандан кейин оилавий келишмовчиликлар келиб чиқди. 4 нафар фарзандим бор. Оилам ҳам барбод бўлди, шу сабабли видеомурожаат йўллашга мажбур бўлдим”, — дейди у.