2023 йил 9 март куни Ўзбекистон Республикаси ТИВ раҳбари Бахтиёр Саидов “Европа Иттифоқи – Марказий Осиё” фуқаролик жамияти форумида иштирок этиш учун Тошкентга келган Европа Иттифоқининг Марказий Осиё бўйича махсус вакили Тери Хакалани қабул қилди.
Мулоқот чоғида 2022 йилда олий ва юқори даражада ўтказилган икки томонлама ва минтақалараро тадбирлар якунлари муҳокама қилинди. Мамлакатимиз билан Европа Иттифоқи ўртасидаги ҳамкорликни барча соҳаларда янада мустаҳкамлаш истиқболлари кўриб чиқилди.
Томонлар Ўзбекистон ва Европа Иттифоқи ўртасида кенгайтирилган шериклик ва ҳамкорлик тўғрисидаги битимни тез фурсатларда имзолаш учун қўшма чора-тадбирлар кўришга тайёр эканликларини тасдиқладилар.