Прокуратура органлари ходимлари куни муносабати билан Президент Шавкат Мирзиёев томонидан бир гуруҳ фидойи ва тажрибали мутахассислар давлат мукофотлари билан тақдирланди. Мукофотлар ҳуқуқ-тартиботни мустаҳкамлаш, қонун устуворлигини таъминлаш ва тизимдаги самарали хизматлари учун берилди.
Жумладан, прокуратура фахрийларини ижтимоий қўллаб-қувватлаш йўлидаги фаолияти учун Калонов Ботир Хамзаевич "Меҳнат шуҳрати" орденига сазовор бўлди. Иқтисодий жиноятларга қарши курашиш борасидаги жасорати учун эса Юнусов Марат Эркинович "Мардлик" ордени билан мукофотланди.
Шунингдек, Тошкент шаҳрида хизмат олиб бораётган Разакова Гулчехра Нарзуллаевна "Дўстлик" ордени билан тақдирланди. Жиззах вилояти прокуратураси бўлим бошлиғи Зарипов Жамшид Баходирович ҳамда Президент Администрацияси масъул ходими Махмудов Муродбек Мадиёрович "Жасорат" медали билан эътироф этилди.
Бундан ташқари, бир қатор прокуратура ходимларига "Содиқ хизматлари учун" ва «Шуҳрат» медаллари топширилди. Давлат раҳбари ушбу мукофотлар орқали прокуратура тизимида ҳалол, масъулиятли ва фидокорона меҳнат қилаётган ходимларнинг хизматини юксак баҳолади.