БМТнинг Наркотиклар ва жиноятчилик бўйича бошқармаси (НЖБ) ва "БМТ-аёллар" тузилмаси 25 ноябрь — Хотин-қизларга нисбатан зўравонликка барҳам бериш халқаро куни муносабати билан навбатдаги глобал ҳисоботни эълон қилди. Унда аёлларга қарши зўравонлик ва гендер асосидаги қотилликларнинг юқори даражада сақланаётгани қайд этилган. Бу ҳақда Al Jazeera хабар бермоқда.
Ҳисоботга кўра, 2024 йилда дунё бўйича 83 минг аёл ва қиз қасддан ўлдирилган бўлиб, уларнинг 60 фоизи — 50 минг нафари яқинлари ёки шериклари томонидан қурбон бўлган. Таққослаш учун, эркаклар ўртасида бу кўрсаткич анча паст — 11 фоиз атрофида.
Маълумотларга кўра, гендер асосидаги қотилликлар барча минтақаларда қайд этилмоқда. Энг юқори кўрсаткич Африкага тўғри келади — ҳар 100 минг аёл ва қизга 3 та ҳолат. Америка минтақасида бу рақам 1,5, Океанияда 1,4, Осиёда 0,7, Европада эса 0,5 ҳолатни ташкил этган.
Мутахассислар узоқ йиллардан бери мавжуд бўлган халқаро мажбуриятларга қарамай, статистикалар сезиларли даражада камаймаётганини таъкидлади. Ҳисобот аёллар ва қизларни ҳимоя қилиш бўйича глобал сиёсий чораларни кучайтириш зарурлигини яна бир бор кўрсатиб берди.