Франция Миллий Ассамблеяси 15 ёшгача бўлган болаларга ижтимоий тармоқлардан фойдаланишни тақиқлашни назарда тутувчи қонун лойиҳасини биринчи ўқишда маъқуллади. Бу ҳақда Franceinfo хабар берди.
Овоз бериш 27 январга ўтар кечаси бўлиб ўтган. Қонун лойиҳасини 116 нафар депутат томонидан қўллаб-қувватланган.
Франция президенти Эммануэл Макрон ҳукуматдан мазкур қонунни қабул қилиш жараёнини тезлаштиришни сўраган. Унинг таъкидлашича, тақиқ 2026 йил 1 сентябргача, яъни янги ўқув йили бошланишидан олдин кучга кириши лозим.
“Болаларимизнинг мияси сотилмайди — на Америка платформаларига, на Хитой телеканалларига. Уларнинг орзуларини алгоритмлар белгилаб бера олмайди”, — деб ёзди Макрон Х ижтимоий тармоғидаги саҳифасида.
Маълум қилинишича, Эммануэл Макрон 2025 йил июнь ойида болаларнинг ижтимоий тармоқлардан фойдаланишини чеклаш режасини эълон қилган. Президентнинг фикрича, ижтимоий тармоқлар ёшларнинг руҳий саломатлигига салбий таъсир кўрсатади, айниқса босим ва зўравонликка оид контент ёшлар орасида кенг тарқалаётгани хавотирли.
2025 йил охирида Франция ҳукумати ушбу масалага оид икки қисмдан иборат қонун лойиҳасини тайёрлаган. Унинг иккинчи қисмида ўрта мактабларда мобил телефонлардан фойдаланишни тақиқлаш таклифи ҳам ўрин олган.