Туркия Фавқулодда вазиятлар бошқармасининг Анқарадаги бош қароргоҳида Президент Режеп Таййип Эрдоғаннинг республика Вазирлар Маҳкамаси йиғилиши якунлари бўйича мурожаати тингланди. Бу ҳақда Анадолу агентлиги хабар бермоқда.
Маълум қилинишича, Туркия ҳукумати зилзиладан зарар кўрган барча ҳудудларда йил давомида одамлар учун сифатли ва хавфсиз уй-жой қурилишини якунлашни режалаштирмоқда.
Шунингдек, Туркия раҳбарининг сўзларига кўра, табиий офат ҳудудида 28 минг турк аскари хизмат қилмоқда.
«15 феврал куни Туркия вақти билан соат 20:00да «Туркия – бир юрак» шиори остида Туркия, Озарбайжон ва Шимолий Кипрдаги Турк Республикасида зилзила қурбонларига ёрдам акцияси бўлиб ўтади», — дея қўшимча қилди Эрдоған.
Эслатиб ўтамиз, зилзила қурбонлари сони 35 400 кишидан ошди. Жабрланганларнинг 13 минг 208 нафари шифохоналарда даволанмоқда.