Ҳуқуқни муҳофаза қилувчи органлар томонидан ўтказилган тезкор тадбир давомида йирик миқдорда пул талаб қилган фирибгарлик ҳолати фош этилди. Бу ҳақда ДХХ Zamon.uzga хабар берди.
Маълум бўлишича, Сирдарё вилояти Сирдарё туманида яшовчи, 1973 йилда туғилган хусусий тадбиркор Бухоро вилояти Пешку тумани ҳудудида жойлашган, олтин ва бошқа қимматбаҳо металларга эга давлат захирасидаги 290 гектар ер майдонини мансабдор танишлари орқали аукцион савдолари орқали олиб беришни ваъда қилган.
У мазкур хизмат эвазига Шофиркон туманида яшовчи, 1983 йилда туғилган фуқародан 600 минг АҚШ доллари талаб қилган.
Давлат хавфсизлик хизмати Бухоро вилояти бошқармаси ҳамда Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда, муқаддам фирибгарлик жинояти учун бир неча бор судланган ушбу шахс олдиндан 230 минг АҚШ доллари ва 840 миллион сўм пул маблағларини олган вақтида ашёвий далиллар билан қўлга олинган.
Мазкур ҳолат юзасидан Жиноят кодексининг 25, 168-моддаси 4-қисми «а» банди ҳамда 28, 211-моддаси 3-қисми «а» банди билан жиноят иши қўзғатилган. Гумонланувчига нисбатан қамоқ эҳтиёт чораси қўлланилган.
Ҳозирда тергов ҳаракатлари олиб борилмоқда