Буюк Британия Бош вазири Кейр Стармер яқин кунларда Фаластин давлатини расман тан олиш ҳақида баёнот бериши режалаштирилмоқда. Мазкур қарор, аввалроқ у таъкидлаганидек, Исроилнинг Ғазо секторида ўт очишни тўхтатиши ва тинчлик йўлида амалий қадамлар ташлашига боғлиқ эди.
Исроил ҳукумати ва гаровдагилар оилалари ушбу ташаббусни кескин танқид қилиб, уни “террорчиликни рағбатлантириш” дея баҳолади. Исроил Бош вазири Биньямин Нетаняҳу қарорни қоралаган бўлса, АҚШ Президенти Дональд Трамп ҳам унга қарши чиққанини билдирди.
Британия ҳукумати бу қадамни Ғазо секторидаги оғир инсонпарварлик вазияти ва Ғарбий соҳилда давом этаётган ноқонуний аҳоли пунктлари билан изоҳлади.
Фаластин Президенти Маҳмуд Аббос эса мазкур қарорни олқишлаб, уни минтақада адолатли тинчлик сари муҳим қадам сифатида баҳолади. Шу билан бирга, БМТга аъзо давлатларнинг аксарияти Фаластинни тан олгани, шунингдек, яқинда Португалия, Франция, Канада ва Австралия ҳам бу йўлдан боришини билдиргани маълум қилинди.