Сенат раиси муҳокама қилинаётган Қонуннинг аҳамияти ҳақида гапирди.
"Дарахтларни нобуд қилишнинг экологик, ижтимоий-иқтисодий жиддий оқибатлари хусусида бугун ортиқча изоҳга ҳожат йўқ.
Жамиятда бунга нисбатан муросасиз муносабат, яъни дарахт кесиш — жиноят, деган қараш шаклланди. Шу билан бирга, амалиётда ноқонуний дарахт кесиш ҳоллари тўлиқ барҳам топмаган бўлиб, мазкур жиноятнинг асосан оқибатлари билан курашилмоқда. Яъни дарахтларга шикаст етказиб, нобуд қилиб бўлинганидан кейингина чора кўрилмоқда. Бу ҳол айниқса қурилиш соҳасида кўп кузатилмоқда", — дейди Танзила Нарбаева.
Таъкидланишича, муҳокама қилинаётган Қонун билан дарахтларни кесиш, шикастлантириш, йўқ қилинишига олиб келиши мумкин бўлган ёки олиб келган қурилиш лойиҳа ҳужжатларини тайёрлаганлик учун жавобгарлик белгиланаётгани алоҳида аҳамиятга эга.
"Яъни, нафақат бундай ноқонуний ҳаракатларни бевосита амалга оширган шахсларни, балки биринчи навбатда, бунинг учун масъул бўлган мутасаддиларни ҳам тегишли жавобгарликка тортиш ҳақида сўз бормоқда.
Демак, эндиликда нафақат оқибатлар билан курашиш, балки сабаб ва асосларга йўл бермасликнинг аниқ ҳуқуқий асоси яратилмоқда", — дейди Сенат раиси.