Президент Шавкат Мирзиёевга коррупцияга қарши курашиш ва комплаенс назоратини такомиллаштириш бўйича амалга оширилаётган ишлар тақдимоти ўтказилди. Давлат органларида ўтказилган 11 мингдан ортиқ ўрганишлар натижасида 793 млрд сўмлик маблағларнинг мақсадсиз сарфланиши олди олингани, қарийб 2 трлн сўмлик хато ва камчиликлар аниқлангани маълум қилинди. Шунингдек, 478 млрд сўмлик зарар ундирилди.
Тақдимотда комплаенс бўлинмаларининг самарадорлигини ошириш, уларни тўлиқ рақамлаштириш ва сунъий интеллект асосида хавф-таҳлил тизимини яратиш масалалари муҳокама қилинди. Давлат харидларидаги хавфли ҳолатларни автоматик аниқлаш, «Э-қарор» тизимида ҳужжатларнинг очиқлигини кучайтириш ҳамда жамоатчилик назоратини кенгайтириш бўйича топшириқлар берилди.
Коррупцияга қарши курашишда кенг жамоатчилик иштирокини таъминлаш, хабар берувчиларни ҳимоя қилиш ва рағбатлантириш механизмларини жорий этиш муҳимлиги қайд этилди. Шу муносабат билан “Коррупцияга қарши курашишга қўшган ҳиссаси учун” кўкрак нишонини таъсис этиш таклифи билдирилган. Мутасаддиларга жиноят оқибатини эмас, унинг илдизини бартараф этишга қаратилган профилактик чораларни кучайтириш вазифаси юклатилди.